1.ཅི་ཞིག་ལ་རྩ་ཁྲིམས་ཟེར།
རྩ་ཁྲིམས་ནི་རྒྱལ་ཁབ་ཀྱི་གཞི་རྩའི་བཅའ་ཁྲིམས་ཡིན། དེས་སྤྱིར་བཏང་དུ་རྒྱལ་ཁབ་ཅིག་གི་སྤྱི་ཚོགས་ལམ་ལུགས་དང་རྒྱལ་ཁབ་ཀྱི་ལམ་ལུགས། རྒྱལ་ཁབ་ལས་ཁུངས་ཀྱི་རྩ་འཛུགས་དང་བྱེད་སྒོ་སྤེལ་བའི་རྩ་དོན། སྤྱི་དམངས་ཀྱི་གཞི་རྩའི་དབང་ཆ་དང་འོས་འགན་སོགས་ནང་དོན་གཏན་ཁེལ་བྱེད་པ་ཡིན་ལ། རྒྱལ་ཁབ་ཀྱི་བཅའ་ཁྲིམས་མ་ལག་ཧྲིལ་བོའི་ཁྲོད་རྩ་ཁྲིམས་ལ་བཅའ་ཁྲིམས་ཀྱི་ཕན་ནུས་ཆེས་ཆེན་པོ་ལྡན་པ་ཡིན།
2.རྩ་ཁྲིམས་ཀྱི་ཁྱད་ཆོས་གཙོ་བོ་ཅི་ཞིག་ཡིན།
རྩ་ཁྲིམས་ཀྱི་ཁྱད་ཆོས་གཙོ་བོ་ཕྱོགས་གསུམ་དུ་བསྡུས་ཆོག་སྟེ། （གཅིག）གཏན་ཕབ་བྱས་པའི་ནང་དོན་གྱི་ཐད་ནས། རྩ་ཁྲིམས་ཀྱིས་གཏན་ལ་ཕབ་པ་ནི་རྒྱལ་ཁབ་ཀྱི་ལམ་ལུགས་དང་སྤྱི་ཚོགས་ལམ་ལུགས་ཀྱི་ཆེས་གཞི་རྩའི་རྩ་དོན་དང་། སྤྱི་དམངས་ཀྱི་གཞི་རྩའི་དབང་ཆ་དང་འོས་འགན། རྒྱལ་ཁབ་ལས་ཁུངས་ཀྱི་རྩ་འཛུགས་དང་དེས་བྱེད་སྒོ་སྤེལ་བའི་རྩ་དོན་སོགས་ཡིན།（གཉིས）བཅའ་ཁྲིམས་ཀྱི་གོ་གནས་སམ་ཕན་ནུས་ཐད་ནས། རྩ་ཁྲིམས་ལ་བཅའ་ཁྲིམས་ཀྱི་གོ་གནས་སམ་ཕན་ནུས་ཆེས་ཆེན་པོ་ལྡན་པ་ཡིན།（གསུམ）ལམ་ལུགས་དང་བཟོ་བཅོས་བྱེད་པ་དེ་སྤྱིར་བཏང་གི་བཅའ་ཁྲིམས་མི་འདྲ་བའི་གོ་རིམ་ཁྱད་པར་བ་བརྒྱུད་དགོས་པ་ཡིན།
3.རང་རྒྱལ་གྱི་གཞི་རྩའི་ལམ་ལུགས་ཅི་ཞིག་ཡིན།
སྤྱི་ཚོགས་རིང་ལུགས་ཀྱི་ལམ་ལུགས་ནི་རང་རྒྱལ་གྱི་གཞི་རྩའི་ལམ་ལུགས་ཡིན།
4.རང་རྒྱལ་གྱི་རྒྱལ་ཁབ་ཀྱི་ངོ་བོ་ཅི་ཞིག་ཡིན།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས》ཀྱི་དོན་ཚན་དང་པོ་ལས“ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ནི་བཟོ་བ་གྲལ་རིམ་གྱིས་འགོ་ཁྲིད་པ་དང་། བཟོ་ཞིང་མནའ་འབྲེལ་གྱིས་རྨང་གཞི་བྱས་པའི་མི་དམངས་དམངས་གཙོ་སྲིད་དབང་སྒེར་འཛིན་གྱི་སྤྱི་ཚོགས་རིང་ལུགས་ཀྱི་རྒྱལ་ཁབ་ཅིག་ཡིན”ཞེས་གཏན་ལ་ཕབ་ཡོད།
5.ཅི་ཞིག་ལ་ཁྲིམས་ལྟར་རྒྱལ་ཁབ་བཅོས་སྐྱོང་བྱེད་པ་ཟེར།
ཁྲིམས་ལྟར་རྒྱལ་ཁབ་བཅོས་སྐྱོང་བྱེད་པ་ནི་ཏང་གི་འགོ་ཁྲིད་འོག རྒྱ་ཆེའི་མི་དམངས་མང་ཚོགས་ཀྱིས་རྩ་ཁྲིམས་དང་བཅའ་ཁྲིམས་ཀྱི་གཏན་ཕབ་ལྟར། ཐབས་ལམ་དང་རྣམ་པ་སྣ་ཚོགས་བརྒྱུད་ནས་རྒྱལ་ཁབ་ཀྱི་དོན་དག་དང་། དཔལ་འབྱོར་དང་རིག་གནས་ལས་དོན། སྤྱི་ཚོགས་ལས་དོན་བཅས་ལ་དོ་དམ་བྱས་ནས། རྒྱལ་ཁབ་ཀྱི་བྱ་བ་སྣ་ཚོགས་ཚང་མ་ཁྲིམས་ལྟར་བསྒྲུབ་པར་ཁག་ཐེག་བྱེད་པ་དང་། སྤྱི་ཚོགས་རིང་ལུགས་ཀྱི་དམངས་གཙོ་ལམ་ལུགས་དང་བཅའ་ཁྲིམས་ཅན་དུ་རིམ་བཞིན་མངོན་འགྱུར་བྱས་ཐོག ལམ་ལུགས་དང་བཅའ་ཁྲིམས་དེ་འགོ་ཁྲིད་པ་འགྱུར་ལྡོག་བྱུང་བར་བསྟུན་ནས་མི་འགྱུར་བ་དང་།འགོ་ཁྲིད་པའི་ལྟ་ཚུལ་དང་བློ་རྩེ་འགྱུར་བར་བསྟུན་ནས་མི་འགྱུར་བར་བྱེད་དགོས།
6.ཅི་ཞིག་ལ་སྤྱི་དམངས་ཟེར།
སྤྱི་དམངས་ཞེས་པ་ནི་རྒྱལ་ཁབ་ཅིག་གི་རྒྱལ་ཁོངས་ཡོད་པ་དང་། རྒྱལ་ཁབ་དེའི་རྩ་ཁྲིམས་དང་བཅའ་ཁྲིམས་ཀྱི་གཏན་ཕབ་ལྟར་ཁེ་དབང་ལོངས་སྤྱོད་པ་དང་འོས་འགན་སྒྲུབ་པའི་རང་བྱུང་གི་མི་ལ་ཟེར། རང་རྒྱལ་གྱི《རྩ་ཁྲིམས》ཀྱི་དོན་ཚན་སོ་གསུམ་པ་ལས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་ཁོངས་ཡོད་པའི་མི་ཞིག་ཡིན་ཕྱིན་ཚང་མ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ཡིན་ཞེས་གཏན་ལ་ཕབ་ཡོད་ལ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ཚང་མ་བཅའ་ཁྲིམས་ཀྱི་མདུན་དུ་འདྲ་མཉམ་ཡིན།
7.རང་རྒྱལ་གྱི་སྤྱི་དམངས་ལ་གཞི་རྩའི་དབང་ཆ་གང་དག་ཡོད་དམ།
《རྩ་ཁྲིམས》ཀྱི་འབྲེལ་ཡོད་གཏན་ཕབ་ལྟར་ན། རང་རྒྱལ་སྤྱི་དམངས་ལ་མངའ་བའི་གཞི་རྩའི་དབང་ཆའི་ནང་དུ་གཤམ་གྱི་ཕྱོགས་འགའ་འདུས་ཏེ།（གཅིག）འདེམས་བསྐོ་དང་འདེམས་བསྐོ་བྱ་ཡུལ་གྱི་དབང་ཆ་ཡོད་པ།（གཉིས）གཏམ་བརྗོད་དང་པར་སྐྲུན། འདུ་ཚོགས། ཚོགས་པ་གསར་འཛུགས། ཁྲོམ་སྐོར། རྔམ་སྟོན་བཅས་བྱེད་པའི་རང་དབང་ཡོད།（གསུམ）མི་ལུས་རང་དབང་དང་མིའི་ཐོབ་ཐང་དང་ལ་རྒྱ། སྡོད་ཤག འཕྲིན་གཏོང་རང་དབང་དང་གསང་འཕྲིན་བཅས་ལ་གནོད་འཚེ་སྐྱེལ་མི་ཆོག་པ།（བཞི）སྐྱོན་བརྗོད་དང་གྲོས་གཞི་འདོན་པ། རྒྱུ་མཚན་ཞུ་འབུལ། གཏུག་བཤེར་དང་ཐར་འདོན་བྱེད་པ། ཁྲིམས་ལྟར་སྐྱིན་ཚབ་ལེན་པ་བཅས་ཀྱི་དབང་ཆ་ཡོད།（ལྔ）ངལ་རྩོལ་གྱི་དབང་ཆ་དང་འོས་འགན་ཡོད་པ།（དྲུག）དངོས་པོའི་རོགས་སྐྱོར་ཐོབ་པའི་དབང་ཆ་ཡོད།（བདུན）རིག་གནས་སློབ་གསོ་ཐོབ་དབང་ཡོད།（བརྒྱད）བུད་མེད་དང་གཉེན་སྒྲིག་ཁྱིམ་ཚང་། མ་བུ་བཅས་ལ་བཅས་ལ་རྒྱལ་ཁབ་ཀྱིས་སྲུང་སྐྱོབ་བྱེད་པ།（དགུ）ཕྱིར་སྡོད་རང་མི་དང་ཕྱིར་ལོག་རང་མི། ཕྱིར་སྡོད་རང་མིའི་ཁྱིམ་མི་བཅས་ཀྱི་ཁེ་དབང་ལ་རྒྱལ་ཁབ་ཀྱིས་སྲུང་སྐྱོབ་བྱེད་པ་བཅས་སོ།།8.རང་རྒྱལ་གྱི་ཆེས་མཐོ་བའི་རྒྱལ་ཁབ་དབང་འཛིན་ལས་ཁུངས་ནི་གང་ཡིན།དེའི་གཏན་བཙུགས་ལས་ཁུངས་ནི་གང་ཡིན།
ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་ཡོངས་མི་དམངས་འཐུས་མི་ཚོགས་ཆེན་ནི་ཆེས་མཐོ་བའི་རྒྱལ་ཁབ་དབང་འཛིན་ལས་ཁུངས་ཡིན།དེའི་གཏན་བཙུགས་ལས་ཁུངས་ནི་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ཡིན།
9.སྤྱི་དམངས་ལ་གཞི་རྩའི་འོས་འགན་གང་དག་ཡོད་དམ།
རང་རྒྱལ《རྩ་ཁྲིམས》ཀྱིས་གཏན་ལ་ཕབ་བའི་སྤྱི་དམངས་ཀྱིས་ངེས་པར་དུ་སྒྲུབ་དགོས་པའི་གཞི་རྩའི་འོས་འགན་ནི།
1.སྤྱི་དམངས་ལ་རྒྱལ་ཁབ་ཀྱི་གཅིག་གྱུར་དང་རྒྱལ་ཡོངས་ཀྱི་མི་རིགས་སོ་སོའི་མཐུན་ སྒྲིལ་སྲུང་སྐྱོང་བྱེད་པའི་འོས་འགན་ཡོད།
2.སྤྱི་དམངས་ཀྱིས་ངེས་པར་དུ་རྩ་ཁྲིམས་དང་བཅའ་ཁྲིམས་བརྩི་སྲུང་དང་། རྒྱལ་ཁབ་ གསང་དོན་དམ་་སྲུང་། སྤྱིའི་རྒྱུ་ནོར་ལ་གཅེས་སྤྲས། ངལ་རྩོལ་གྱི་སྒྲིག་ལམ་བརྩི་སྲུང་། སྤྱིའི་སྒྲིག་ལམ་བརྩི་སྲུང་། སྤྱི་ཚོགས་ཀྱི་ཀུན་སྤྱོད་བརྩི་མཐོང་བྱེད་པའི་འོས་འགན་ཡོད།
3.སྤྱི་དམངས་ལ་མེས་རྒྱལ་གྱི་བདེ་འཇགས་དང་མཚན་སྙན། ཁེ་ཕན་བཅས་སྲུང་སྐྱོང་བྱེད་པའི་འོས་འགན་ཡོད།
4.སྤྱི་དམངས་ལ་མེས་རྒྱལ་སྲུང་སྐྱོང་དང་བཙན་འཛུལ་ལ་ངོ་རྒོལ། ཁྲིམས་ལྟར་དམག་ཞབས་སྒྲུབ་པ་དང་དམངས་དམག་རྩ་འཛུགས་བྱེད་པའི་འོས་འགན་ཡོད།
5.སྤྱི་དམངས་ལ་ཁྲིམས་ལྟར་དཔྱ་ཁྲལ་འཇལ་བའི་འོས་འགན་ཡོད། གོང་གི་ཕྱོགས་ལྔའི་གཞི་རྩའི་འོས་འགན་ལས་གཞན། སྤྱི་དམངས་ལ་ད་དུང་ངལ་རྩོལ་བྱེད་པ་དང་སློབ་གསོ་མྱོང་བའི་འོས་འགན་ཡོད་པ་དང་། ཁྱོ་ཤུག་གཉིས་ཀར་འཆར་ལྡན་བུ་སྐྱེས་ལག་བསྟར་བྱེད་པའི་འོས་འགན་དང་། ཕ་མར་ནར་མ་སོན་པའི་བུ་བུ་མོ་གཉོར་སྐྱོང་བྱེད་པའི་འོས་འགན། ནར་སོན་པའི་བུ་བུ་མོར་ཕ་མ་གསོ་སྐྱོང་བྱེད་པའི་འོས་འགན་སོགས་ཡོད།
10.བཅའ་ཁྲིམས་ཀྱིས་སྤྱི་དམངས་ཀྱི་མི་ལུས་རང་དབང་སྲུང་སྐྱོང་བྱེད་པའི་སྐོར་ལ་གཏན་ཕབ་གང་དག་བྱས་ཡོད་དམ།
《རྩ་ཁྲིམས》ཀྱི་དོན་ཚན་སོ་བདུན་པ་ལས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ཀྱི་མི་ལུས་རང་དབང་ལ་གནོད་འཚེ་སྐྱེལ་མི་ཆོག སྤྱི་དམངས་སུ་ཡིན་རུང་། མི་དམངས་ཞིབ་དཔྱོད་ཁང་གིས་ཆོག་མཆན་མ་བཀོད་པའམ་ཐག་མ་བཅད་པ་དང་། ཡང་ན་མི་དམངས་ཁྲིམས་ཁང་གིས་ཐག་མ་བཅད་ཅིང་། སྤྱི་བདེ་ལས་ཁུངས་ཀྱིས་ལག་བསྟར་མ་བྱས་པར་འཛིན་བཟུང་བྱས་མི་ཆོག ཁྲིམས་འགལ་གྱིས་བཀག་སྐྱིལ་བྱེད་པ་དང་ཐབས་གཞན་པ་སྤྱད་ནས་སྤྱི་དམངས་ཀྱི་མི་ལུས་རང་དབང་ཁྲིམས་འགལ་གྱིས་ལེན་པའམ་ཚོད་འཛིན་གཏན་ནས་བྱེད་མི་ཆོག་པ་དང་། སྤྱི་དམངས་ཀྱི་ལུས་པོར་ཁྲིམས་འགལ་གྱིས་སྔོག་བཤེར་གཏན་ནས་བྱས་མི་ཆོག་ཅེས་གཏན་ཕབ་གསལ་བོར་བྱས་ཡོད།
11.བཅའ་ཁྲིམས་ཀྱིས་སྤྱི་དམངས་ཀྱི་གཉེན་སྒྲིག་ཁྱིམ་ཚང་སྲུང་སྐྱོང་བྱེད་པའི་སྐོར་ལ་གཏན་ཕབ་གང་དག་བྱས་ཡོད་དམ།
《རྩ་ཁྲིམས》ཀྱི་དོན་ཚན་ཞེ་དགུ་བ་ལས་གཏན་ལ་ཕབ་དོན། གཉེན་སྒྲིག་དང་ཁྱིམ་ཚང་།མ་དང་བྱིས་པར་རྒྱལ་ཁབ་ཀྱིས་སྲུང་སྐྱོང་བྱེད་པ་ཡིན། ཁྱོ་ཤུག་གཉིས་ཀར་འཆར་ལྡན་བུ་སྐྱེས་ལག་བསྟར་བྱེད་པའི་འོས་འགན་ཡོད། ཕ་མར་ནར་མ་སོན་པའི་བུ་བུ་མོ་གཉོར་སྐྱོང་བྱེད་པའི་འོས་འགན་ཡོད། ནར་སོན་བུ་བུ་མོར་ཕ་མ་གསོ་སྐྱོང་བྱེད་པའི་འོས་འགན་ཡོད། གཉེན་སྒྲིག་རང་དབང་ལ་གཏོར་བརླག་བྱས་མི་ཆོག་པ་དང་། མི་རྒན་པ་དང་བུད་མེད། བྱིས་པ་བཅས་ལ་མནར་གཅོད་གཏོང་མི་ཆོག |
