ཟླ་གསུམ་པའི་ཚེས་ལྔ་ཉིན་ནས་བཟུང་། མཚོ་བྱང་བོད་རིགས་རང་སྐྱོང་ཁུལ་ཐད་གཏོགས་ལས་ཁུངས་ཀྱི་ལས་བྱེད་པ་བརྒྱ་ལྷག་སོ་སོར་རྫོང་བཞི་ལ་སོང་ནས།  གཞི་རིམ་དུ་བསྐྱོད་དེ་ཀྲུང་དབྱང་དང་ཞིང་ཆེན་ཏང་ཨུའི་ཡིག་ཆ་དང་པོའི་དགོངས་དོན་དྲིལ་སྒྲོག་བྱས་པ་དང་།  སྟོབས་ཤུགས་ཡོད་དགུས་ཞིང་གསུམ་བྱ་བར་ཞབས་ཕྱི་བསྒྲུབས།  
   བྱ་འགུལ་དེ་ཉིན་བཅོ་ལྔའི་རིང་ལ་སྤེལ་རྒྱུ་ཡིན་པ་དང་། ཟླ་གསུམ་པའི་ཚེས་ལྔ་ཉིན་མགོ་བརྩམས་ཏེ་ཟླ་གསུམ་པའི་ཚེས་ཉི་ཤུའི་ཉིན་མཇུག་རྫོགས་རྒྱུ་རེད།  བྱ་འགུལ་སྤེལ་སྐབས་ཀྲུང་དབྱང་དང་ཞིང་ཆེན་ཏང་ཨུའི་ཡིག་ཆ་དང་པོའི་དགོངས་དོན་བརྒྱུད་སྒྲོག་བྱས་པ་བརྒྱུད།  ཏང་གི་དམངས་ཕྱུག་སྲིད་ཇུས་རོང་འབྲོག་ཁུལ་དུ་སྐྱེལ་བ་དང་།  མི་དམངས་མང་ཚོགས་ལ་ཏང་གི་ཡང་དག་པའི་ཞིང་ལས་སྲིད་ཇུས་ཤེས་སུ་འཇུག་པ་དང། སྤྲོ་སེམས་ཡོད་པའི་སྒོ་ནས་མི་དམངས་ཀྱི་ཧུར་བརྩོན་རང་བཞིན་དང་གསར་གཏོད་རང་བཞིན་སྐུལ་སྤེལ་བྱས་ནས།   རོང་འབྲོག་པ་མང་ཚོགས་ཞིང་ཕྱུགས་ལས་བཅོས་བསྒྱུར་འཕེལ་རྒྱས་ཀྱི་ཕྱོགས་སུ་བསྐྱོད་པའི་གཙོ་ཤུགས་དམགས་དཔུང་དུ་འགྱུར་བར་སྐུལ་འདེད་བྱས། 
   བྱ་བའི་ཚན་ཁག་སོ་སོས་དྲིལ་སྒྲོག་བྱ་བ་དམ་འཛིན་ལེགས་པོ་བྱས་པ་དང་མཉམ་དུ།  སྟོབས་ཤུགས་ཡོད་དགུས་ཞིང་བར་རྒྱབ་སྐྱོར་བྱེད་པའི་ཞབས་ཞུའི་བྱ་བ་བཟང་པོར་སྒྲུབ་པ་དང་།  གཞི་རིམ་གྱི་བརྟན་འཇགས་ལ་སྲུང་སྐྱོང་།  ཤུགས་ཆེན་པོས་གཞི་རིམ་རྩ་འཛུགས་འཛུགས་སྐྲུན་བྱ་བར་རྟོག་དཔྱོད་ཞིབ་འཇུག་བྱེད་པ་སོགས་ཀྱི་བྱ་བ་བསྒྲུབ་རྒྱུ་རེད། 
   དེ་དང་མཉམ་དུ་དངུལ་ལོར་ལས་ཁུངས་ལ་མཐུན་སྦྱོར་འབྲེལ་གཏུགས་བྱས་ཏེ།  ཞིང་ལས་ཕྱོགས་ཀྱི་ཡིད་རྟོན་དངུལ་བུན་དངོས་འབེབ་བྱས་ནས་མི་དམངས་མང་ཚོགས་ལ་མ་དངུལ་དཀོན་པའི་གནད་དོན་ཐག་གཅོད་རྒྱུ་རེད།  གཞི་རིམ་དྲིལ་སྒྲོག་གི་བྱ་བར་ཕན་འབྲས་འབྱུང་བར་ཁག་ཐེག་བྱ་ཆེད། ཁུལ་གྱི་རོང་འབྲོག་ཁུལ་བྱ་བའི་མགོ་ཁྲིད་ཚན་ཆུང་གིས་ལྟ་ཞིབ་ཚན་ཆུང་བཞི་བཙུགས་ཏེ།  ས་ཁུལ་སོ་སོར་སོང་ནས་ཚན་ཁག་སོ་སོའི་གཞི་རིམ་དུ་བསྐྱོད་པའི་བྱ་བའི་གནས་ཚུལ་ལ་རྒྱུས་ལོན་དང་རྟོག་དཔྱོད་བྱས། 

ལོ་ཙཱ་བ། དངོས་སྦྱོང་སློབ་མ་ཀླུ་རྒྱལ་དོན་གྲུབ།