ཟླ་བདུན་པའི་ཚེས་ཉེར་བརྒྱད་ཉིན་གྱི་དགོང་མོར“ཡུས་ཧྲུའུ་མ་ཉམས་ན་མེས་རྒྱལ་ལ་དྲིན་ལེན་འཇལ་དགོས”ཞེས་པའི་མཚོ་སྔོན་ཡུས་ཧྲུའུ་ས་ཡོམ་གནོད་ཐེབས་
ས་ཁུལ་གྱི་མཛེས་སྡུག་གི་ཁྱིམ་གཞི་བསྐྱར་འཛུགས་བྱེད་པའི་ཆེད་སྒྲིག་ལེ་ཚན་དགོང་ཚོགས་དེ་པེ་ཅིན་རྒྱང་སྒྲོག་བརྙན་འཕྲིན་ཁང་དུ་བསྡུས།

    མཚོ་སྔོན་ཞིང་ཆེན་མི་དམངས་སྲིད་གཞུང་གིས་གཙོ་སྒྲུབ་བྱས་པའི“ཡུས་ཧྲུའུ་མ་ཉམས་ན་མེས་རྒྱལ་ལ་དྲིན་ལེན་འཇལ་དགོས”ཞེས་པའི་མཚོ་སྔོན་ཡུས་ཧྲུའུ་ས་ཡོམ་གནོད་ཐེབས་ས་ཁུལ་གྱི་མཛེས་སྡུག་གི་ཁྱིམ་གཞི་བསྐྱར་འཛུགས་བྱེད་པའི་ཆེད་སྒྲིག་ལེ་ཚན་དགོང་ཚོགས་དེ་ཚེས་ཉེར་བརྒྱད་ཉིན་གྱི་དགོང་མོར་པེ་ཅིན་རྒྱང་སྒྲོག་བརྙན་འཕྲིན་ཁང་དུ་བསྡུས་པར་མ་ཟད་ཐད་གཏོང་བྱས།

    ཀྲུང་གུང་ཀྲུང་དབྱང་ཆབ་སྲིད་ཅུའི་ཨུ་ཡོན། པེ་ཅིན་གྲོང་ཁྱེར་གྱི་ཏང་ཨུའི་ཧྲུའུ་ཅི་ལིའུ་ཆི་དང་མཚོ་སྔོན་ཞིང་ཆེན་གྱི་ཏང་ཨུའི་ཧྲུའུ་ཅི།  ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཆང་བེ།  རྒྱལ་ཁབ་མི་རིགས་དོན་གཅོད་ཨུ་ཡོན་ལྷན་ཁང་གི་ཏང་ཙུའུ་ཧྲུའུ་ཅི། ཀྲུའུ་རིན་གཞོན་པ་དབྱང་ཁྲོན་ཐང་། པེ་ཅིན་གྲོང་ཁྱེར་གྱི་ཧྲི་ཀྲང་གོ་ཅིན་ལུང་།  ཀྲུང་གོ་རྒྱ་གྲམ་དམར་པོ་ཚོགས་པའི་ཏང་ཙུའུ་ཧྲུའུ་ཅི།  རྒྱུན་ལས་ཚོགས་གཙོ་གཞོན་པ་བང་བེ།  དེ་མིན་རྒྱལ་ཁབ་ཀྱི་འབྲེལ་ཡོད་པུའུ་དང་ཨུ་ཡོན་ལྷན་ཁང་། པེ་ཅིན་གྲོང་ཁྱེར། མཚོ་སྔོན་ཞིང་ཆེན་བཅས་ཀྱི་འབྲེལ་ཡོད་མགོ་ཁྲིད་པས་ཆེད་སྒྲིག་ལེ་ཚན་ལ་བལྟས། 

    ཆེད་སྒྲིག་ལེ་ཚན་དེ་བཀྲ་ཤིས་བདེ་ལེགས་ཞེས་པའི་སྙན་འཇེབས་ཀྱི་གླུ་སྐད་དང་འཇོ་སྒེག་གི་ཞབས་བྲོའི་སྟངས་སྟབས་ཁྲོད་ནས་དངོས་སུ་མགོ་བརྩམས་པ་དང་།  སྤྲོ་སྐྱིད་ཀྱི་གླུ་གར་དེས་གནའ་བའི་ལྐོག་གྱུར་དང་མཛེས་སྡུག་གི་ཡུས་ཧྲུའུ་དེ་མི་རྣམས་ཀྱི་མཐོང་ལམ་དུ་མངོན་པར་བྱས། ལེ་ཚན་མཇུག་རྫོགས་ལ་ཉེ་བའི་སྐབས་སུ་མགོ་འཛིན་པས་ཡུལ་དངོས་ནས་མཚོ་སྔོན་ཞིང་ཆེན་གྱི་ཏང་ཨུའི་ཧྲུའུ་ཅི།  ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཆང་བེ་ལ་བཅར་འདྲི་བྱས།

   མཚོ་སྔོན་ཞིང་ཆེན་ཏང་ཨུའི་དྲིལ་སྒྲོག་པུའུ་དང་ཞིང་ཆེན་ནོར་སྲིད་ཐིན། ཞིང་ཆེན་དམངས་སྲིད་ཐིན།  ཞིང་ཆེན་རིག་གནས་གསར་འགྱུར་དཔེ་སྐྲུན་ཐིན། ཞིང་ཆེན་རྒྱ་གྲམ་དམར་པོ་ཚོགས་པ། ཞིང་ཆེན་སྙིང་རྗེ་སྤྱིའི་ཚོགས་པ།  མཚོ་སྔོན་བརྙན་འཕྲིན་ཁང་། པེ་ཅིན་རྒྱང་སྒྲོག་བརྙན་འཕྲིན་ཁང་བཅས་ཀྱིས་ཐེངས་འདིའི་ཆེད་སྒྲིག་ལེ་ཚན་གྱི་སྒྲུབ་འགན་འཁུར་བ་རེད།

ལོ་ཙཱ་བ།  བཀྲ་ཤིས་འབུམ།