ཟླ་བདུན་པའི་ཚེས་བཅུའི་ཉིན་གྱི་སྔ་དྲོའི་དུས་ཚོད་བརྒྱད་དང་སྐར་མ་སུམ་ཅུའི་སྟེང་། ཧྲིན་ཀྲང་གཞོན་པ། ཞིང་ཆེན་ན་གོར་མོའི་ཆུ་འགོག་ཉེན་སེལ་བཀོད་འདོམས་པུའུ་ཡི་སྤྱི་ཁྱབ་བཀོད་འདོམས་པ་སྟག་འབུམ་ཐར་རླངས་འཁོར་ལ་བསྡད་དེ་སྤྱི་ལེ་བརྒྱ་དང་ཉེར་བདུན་ཕྱི་རོལ་གྱི་བིན་ཆོན་ཆུ་མཛོད་དུ་སོང་ནས། ཆུ་མཛོད་ཀྱི་བདེ་འཇགས་གནས་ཚུལ་དང་། ཆུ་ལོག་ཕུད་སའི་ཆུ་ལམ་ལས་པའི་གནས་ཚུལ་ལ་ལྟ་ཞིབ་བྱས་བར་མ་ཟད། ཡུལ་དངོས་གཞུང་སྒྲུབ་ཚོགས་འདུ་བསྡུས་ཏེ། ཆུ་བེད་དང་འགྲིམ་འགྲུལ། ན་གོར་མོ་གྲོང་ཁྱེར་གྱི་འགོ་ཁྲིད་པ་དང་ལྷན་དུ་རིམ་པ་རྗེས་མའི་བྱ་བར་ཞིབ་འཇུག་བྱས།
    ཕྱི་དྲོའི་དུས་ཚོད་བཞིའི་སྟེང་། སྟག་འབུམ་ཐར་གྱིས་ཆུ་འགོག་ཉེན་སེལ་དུ་ཞུགས་པའི་དྲག་ཆས་ཉེན་རྟོག་སྤྱིའི་རུ་ཁག་གི་ཡན་ལག་རུ་ཁག་གསུམ་པ་དང་། དྲག་ཆས་ཉེན་རྟོག་འགྲིམ་འགྲུལ་རུ་ཁག་དང་པོ། མཚོ་ནུབ་དང་ན་གོར་མོའི་མེ་གསོད་རུ་ཁག་བཅས་ཀྱི་དཔོན་དམག་ལྔ་བརྒྱ་དང་སུམ་ཅུ་ལྷག་ལ་འཚམས་འདྲི་བྱས་པ་དང་། དཔོན་དམག་ཚོས་ས་ཡོམ་གནོད་སེལ་རྒུད་སྐྱོབ་ཀྱི་སྙིང་སྟོབས་དང་བསྟུད་མར་འབད་འཐབ་བྱེད་པའི་སྲོལ་རྒྱུན་དེ་མུ་མཐུད་དུ་དར་སྤེལ་བྱས་ཏེ། ཆུ་མཛོད་ཀྱི་བདེ་འཇགས་ཁག་ཐེག་དང་། ན་གོར་མོ་གྲོང་ཁྱེར་གྱི་བདེ་འཇགས་ལ་ཁག་ཐེག་བྱས་ཏེ། ཆུ་འགོག་ཉེན་སེལ་གྱི་མཇུག་མཐའི་རྒྱལ་ཁ་ལེན་པར་བརྩོན་ལེན་བྱེད་དགོས་པའི་སྐུལ་མ་བཏང་།

ལོ་ཙཱ་བ། ཀླུ་འབུམ་བྱམས།