རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གཅིག་པའི་གྲོས་ཚོགས་ཐེངས་གསུམ་པས་ཚེས་དགུ་ཉིན་གྱི་ཕྱི་དྲོར་མི་དམངས་ཚོགས་ཁང་ཆེན་མོའི་ནང་ཚང་འཛོམས་གྲོས་ཚོགས་ཐེངས་གསུམ་པ་བསྡུས། རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་བུའུ་པང་གོ་ཡིས་རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུ་ཕུལ།
ཧུའུ་ཅིན་ཐའོ་དང་ཝུན་ཅ་པའོ། ཅ་ཆིན་ལིན། ལིས་ཁྲང་ཁྲུང་། ཞི་ཅིན་ཕེན། ལིས་ཁི་ཆང་། ཧི་གོ་ཆང་། ཀྲིག་ཡུང་ཁང་བཅས་གྲོས་ཚོགས་ལ་ཞུགས།
ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི། ལག་བསྟར་ཀྲུའུ་ཞི་བང་ཀྲའོ་གོ་ཡིས་གྲོས་ཚོགས་ལ་མགོ་འཛིན་བྱས།
བུའུ་པང་གོ་ཡིས་སྙན་ཞུའི་ནང་གསུང་དོན། འདས་ཟིན་པའི་ལོ་གཅིག་གི་རིང་ལ། རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་ཏང་གི་སྐབས་བཅུ་བདུན་པ་དང་སྐབས་བཅུ་བདུན་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་བཞི་བའི་དགོངས་དོན་ཕྱོགས་ཡོངས་ནས་ལག་ལེན་མཐར་ཕྱིན་བྱས་ཤིང་། ཏུན་ཞའོ་ཕེན་གྱི་རིགས་པའི་གཞུང་ལུགས་དང་མཚོན་བྱེད་གསུམ་གྱི་དགོངས་པ་གལ་ཆེན་མཛུབ་སྟོན་དུ་བྱས་ཏེ། ཚན་རིག་གི་འཕེལ་རྒྱས་ལྟ་བ་གཏིང་ཟབ་ཏུ་ལག་ལེན་དངོས་འབེབ་བྱེད་པ་དང་། ཏང་གི་མགོ་ཁྲིད་དང་དམངས་ཀྱིས་བདག་པོ་བྱེད་པ། ཁྲིམས་ལྟར་རྒྱལ་ཁབ་སྐྱོང་བ་བཅས་གཅིག་གྱུར་བྱེད་པ་རྒྱུན་འཁྱོངས་བྱས་ནས། རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གཅིག་པའི་གྲོས་ཚོགས་ཐེངས་གཉིས་པའི་དགོངས་དོན་ལྟར། ཏང་དང་རྒྱལ་ཁབ་ཀྱི་བྱ་བའི་ཆེ་ཕྱོགས་ལ་དམ་པོར་དམིགས་ནས་ཁྲིམས་ལྟར་སྲིད་འཛིན་པའི་འགན་དབང་ལག་བསྟར་བྱས་པས་བྱ་བ་སོ་སོར་གྲུབ་འབྲས་གསར་བ་ཐོབ། ལོ་གཅིག་གི་རིང་ལ། བསྡོམས་པས་བཅའ་ཁྲིམས་དང་འབྲེལ་ཡོད་བཅའ་ཁྲིམས་ཀྱི་གནད་དོན་ཉེར་གཉིས་ཀྱི་ཆོད་དོན་འཆར་ཟིན་ལ་གྲོས་ཞིབ་བྱས་པ་དང་། གནད་དོན་བཅུ་བཞི་ལ་གྲོས་འཆམ་བྱུང་། གྲོས་ཆོད་གཉིས་བཏོན། རྒྱལ་སྲིད་སྤྱི་ཁྱབ་ཁང་དང་ཆེས་མཐོའི་མི་དམངས་ཁྲིམས་ཁང་། ཆེས་མཐོའི་མི་དམངས་ཞིབ་དཔྱོད་ཁང་བཅས་ཀྱི་བྱ་བའི་སྙན་ཞུ་བཅུ་བཞི་ལ་གྲོས་ཞིབ་བྱས་པ་དང་། ཆེད་དོན་རྟོག་ཞིབ་སྙན་ཞུ་གཅིག་དང་རྗེས་འདེད་ཞིབ་བཤེར་སྙན་ཞུ་གཅིག་ལ་གྲོས་ཞིབ་བྱས། བཅའ་ཁྲིམས་གསུམ་གྱི་ལག་བསྟར་གནས་ཚུལ་ལ་ཞིབ་བཤེར་བྱས་པར་མ་ཟད། འཐུས་མིའི་གྲོས་གཞི་ལྔ་བརྒྱ་དང་བཅོ་བརྒྱད་ཐག་གཅོད་བྱས་པ་དང་། རང་རྒྱལ་དང་ཕྱི་རྒྱལ་གྱིས་བཞག་པའི་ཆིངས་ཡིག་དང་གྲོས་ཆོད། དེ་མིན་ཟབ་ཞུགས་བྱས་པའི་རྒྱལ་སྤྱིའི་སྤྱི་ཆིངས་བདུན་ལ་ཆོག་མཆན་འགོད་རྒྱུ་ཐག་བཅད། རྒྱལ་ཁབ་ལས་ཁུངས་ཀྱི་བྱ་བའི་མི་སྣ་སྐོར་ཞིག་གི་བསྐོ་འཇོག་འགན་ལེན་ཐག་གཅོད་བྱས་ཏེ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་འཛུགས་སྐྲུན་བྱེད་པར་བྱས་རྗེས་གསར་བ་བཞག་ཅེས་གསུངས།
ལོ་ཙཱ་བ། བསོད་ནམས་ཚེ་རིང་། |
