ཟླ་གསུམ་པའི་ཚེས་བཞི་ཉིན་གྱི་ཕྱི་དྲོ། ཞིང་ཆེན་རྒྱ་གྲམ་དམར་པོ་ཚོགས་པའི་ཚོགས་གཙོ་མཱ་ཧྲུན་ཆིན་མཚོ་སྔོན་རྒྱ་གྲམ་དམར་པོ་སྨན་ཁང་དུ་སོང་ནས་སྨན་ཁང་དེའི་འཕེལ་རྒྱས་ཀྱི་འཛུགས་སྐྲུན་དང་སྨན་བཅོས་བཅོས་སྒྱུར་དང་མི་ཆོས་རོགས་སྐྱོར་སོགས་ཀྱི་བྱ་བའི་འཕེལ་རིམ་ལ་རྟོག་ཞིབ་བྱས།

    མཱ་ཧྲུན་ཆིན་མཚོ་སྔོན་རྒྱ་གྲམ་དམར་པོ་སྨན་ཁང་གི་ནད་པའི་ཞག་སྡོད་བྱེད་སར་སོང་ནས་ནད་པར་བལྟས་པར་མ་ཟད།  སྨན་ཁང་དེའི་སྨན་བཅོས་སྒྲིག་ཆས་དང་ལག་རྩལ་ཆུ་ཚད། ཞབས་ཞུའི་རྒྱུ་སྤུས་སོགས་ཀྱི་ཐད་ལ་ཡུལ་དངོས་ནས་རྟོག་ཞིབ་བྱས།   མཚོ་སྔོན་རྒྱ་གྲམ་དམར་པོ་ཚོགས་པས་ནང་འདྲེན་བྱས་པའི་སུའེ་ཙེར་རྒྱལ་ཁབ་ཀྱི་མི་ཆོས་སྙིང་རྗེ་རྩ་འཛུགས་ཀྱིས་དབུལ་ཕོངས་ཁྱིམ་ཚང་གི་རྒྱུ་རླུག་བྱིས་པ་དྲག་སྐྱེད་འབྱུང་བར་རོགས་སྐྱོར་བྱེད་པའི་ལས་གཞི་ལ་ཁས་ལེན་གང་ལེགས་བྱས།  

   མཱ་ཧྲུན་ཆིན་གྱིས་ནན་གྱིས་བསྟན་དོན།  རྗེས་ཕྱོགས་ཀྱི་འཛུགས་སྐྲུན་དང་འཕེལ་རྒྱས།  བཅོས་བསྒྱུར་བཅས་ཀྱི་ཁྲོད་དུ་མཚོ་སྔོན་རྒྱ་གྲམ་དམར་པོ་སྨན་ཁང་གིས་མུ་མཐུད་དུ་རང་སྟེང་གི་ཁྱད་སྟོབས་བཟང་པོ་འདོན་སྤེལ་གང་ལེགས་བྱེད་དགོས་པ་དང་སྨན་ཁང་གི་འགྲན་རྩོད་གཙོ་བོའི་ནུས་ཤུགས་ཇེ་ཆེར་བཏང་སྟེ།  འབད་བརྩོན་ཆེན་པོས་རྒྱལ་ཁབ་ཀྱི་སྨན་བཅོས་བཅོས་བསྒྱུར་གྱི་ཁྲོད་དུ་ཞུགས་ནས་ཐོག་མཐའ་བར་གསུམ་དུ་ཞིང་ཆེན་ཡོངས་ཀྱི་མི་དམངས་ལ་སྨན་བཅོས་ཀྱི་ཞབས་ཞུ་བཟང་པོ་འདོན་སྤྲོད་བྱེད་པ་དང་། ཕན་འབྲས་ལྡན་པའི་སྒོ་ནས་ནད་པའི་ཁུར་བོ་ཇེ་ཡང་དུ་གཏོང་བའི་ཐད་འབད་བརྩོན་ལྷོད་མེད་བྱས་ཏེ། མཚོ་སྔོན་རྒྱ་གྲམ་དམར་པོ་སྨན་ཁང་དེ་བདེ་ཐང་དང་བློ་གཏད་ཆོག་པའི་སྨན་ཁང་ཞིག་དང་རྒྱ་ཆེའི་མི་དམངས་མང་ཚོགས་ཡིད་ཚིམ་པའི་སྨན་ཁང་ཞིག་ཏུ་འཛུགས་སྐྲུན་བྱས་ཏེ། འབྱོར་ཕྱུག་དང་དཔལ་ཡོན།  འཆམ་མཐུན་བཅས་ཀྱི་མཚོ་སྔོན་གསར་བ་འཛུགས་སྐྲུན་བྱེད་པར་བྱས་རྗེས་གསར་བ་འཇོག་དགོས་པའི་རེ་བ་བཏོན།

ལོ་ཙཱ་བ། གཡང་འབུམ་རྒྱལ།