ཧྲིན་ཀྲང་གཞོན་པ་སྟག་འབུམ་ཐར་གྱིས་ཟླ་གསུམ་པའི་ཚེས་གཅིག་ཉིན་རྒྱལ་ཡོངས་ཀྱི་ནགས་ཚལ་དང་རྩྭ་སའི་མེ་འགོག་བྱ་བའི་བརྙན་འཕྲིན་ཁ་པར་གྲོས་ཚོགས་སྟེ་མཚོ་སྔོན་ཡན་ལག་ཚོགས་ར་ནས་ནན་གྱིས་བསྟན་དོན། ས་གནས་དང་། འབྲེལ་ཡོད་སྡེ་ཁག་སོ་སོས་དེང་སྐབས་ཀྱི་ནགས་ཚལ་དང་རྩྭ་སའི་མེ་འགོག་ཛ་དྲག་ཆེ་བའི་གནས་བབ་གསལ་བོར་བྱས་ནས། ཏང་དང་མི་དམངས་ལ་ཚད་མཐོན་པོའི་འགན་ཁུར་གྱི་རྣམ་འགྱུར་འཛིན་པ་དང་། ལྷོད་གཡེང་གི་བསམ་བློ་ཁྱད་དུ་བསལ་ཏེ། བསམ་བློའི་འདུ་ཤེས་དོན་ཐོག་ཏུ་འཁྱོལ་བར་བྱེད་པ་དང་། མགོ་ཁྲིད་ཀྱི་འགན་ཁུར་དོན་ཐོག་ཏུ་འཁྱོལ་བར་བྱེད་པ། བྱ་བའི་བྱེད་ཐབས་དོན་ཐོག་ཏུ་འཁྱོལ་བར་བྱེད་པ། བཀོད་སྒྲིག་ཞིབ་བཤེར་དོན་ཐོག་ཏུ་འཁྱོལ་བར་བྱས་ནས། སེམས་ཞིབ་མོས་རྩ་འཛུགས་བྱེད་པ་དང་། བཀོད་སྒྲིག་ཞིབ་རྒྱས་བྱས་ནས། ནགས་ཚལ་དང་རྩྭ་སའི་མེ་འགོག་བྱ་བའི་འགན་ཁུར་རང་བཞིན་ཇེ་དྲག་ཏུ་གཏོང་དགོས་ཟེར །
སྟག་འབུམ་ཐར་གྱིས་བསྟན་དོན། ཉེ་བའི་ལོ་འགའི་རིང་ལ། ས་གནས་དང་འབྲེལ་ཡོད་སྡེ་ཁག་སོ་སོས་ནན་ཏན་གྱིས་ནགས་ཚལ་དང་རྩྭ་སའི་མེ་འགོག་གི་འགན་ཁུར་ལམ་ལུགས་ལག་བསྟར་བྱས་པ་དང་། རྒྱུན་ཆད་མེད་པར་མེ་འགོག་བྱེད་ཐབས་ཇེ་དྲག་ཏུ་བཏང་ནས། ཞིང་ཆེན་ཡོངས་ཀྱི་ནགས་ཚལ་དང་རྩྭ་སའི་མེ་འགོག་བྱ་བ་ནན་ཏན་གྱིས་སྒྲུབ་ཏེ་ཕན་འབྲས་མངོན་གསལ་བླངས་བ་དང་། བསྟུད་མར་ལོ་ངོ་ཉེར་གསུམ་གྱི་རིང་ལ་ནགས་ཚལ་དང་རྩྭ་སའི་མེ་སྐྱོན་གཅིག་ཀྱང་མ་བྱུང་བར་མ་ཟད། ནགས་ཚལ་གྱི་ཐོན་ཁུངས་བདེ་འཇགས་ཕན་འབྲས་ལྡན་པའི་སྒོ་ནས་སྲུང་སྐྱོབ་བྱས་ནས། ཚད་ངེས་ཅན་ཞིག་གི་ཐད་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་གྱོང་གུད་ཇེ་ཉུང་ཏུ་བཏང་། ཡིན་ནའང་དེང་སྐབས་རང་ཞིང་གི་ནགས་ཚལ་དང་རྩྭ་སའི་མེ་འགོག་གནས་བབ་ད་རུང་ཚབས་ཆེ་བས། ན་ནིང་དགུན་ཁ་ནས་ད་ལོའི་དཔྱིད་ཀའི་བར་ཞིང་ཆེན་ཡོངས་ཀྱི་ས་ཁུལ་མང་ཆེ་ཤོས་ཤིག་ལ་ཆར་འབབ་ཚད་ཅུང་ཉུང་བ་དང་། ནགས་ཚལ་དང་རྩྭ་སའི་མེ་སྐྱོན་འབྱུང་ཉེན་ཆེ་བར་མ་ཟད། ནགས་ཚལ་དང་རྩྭ་སའི་མེ་འགོག་འདུ་ཤེས་ད་རུང་ཅུང་ཞན་པ་དང་། བྱ་བ་དམ་འཛིན་བྱས་བ་མི་འདང་ཞིང་། མེ་འགོག་བྱེད་ཐབས་དང་དྲིལ་སྒྲོག་གི་སློབ་གསོ་དོན་ཐོག་ཏུ་འཁྱོལ་མེད་པ་དང་། ནགས་ཁུལ་དང་ས་སྟོང་ཁ་ཤས་ཀྱི་མེའི་འབྱུང་ཁུངས་དོ་དམ་བྱས་པ་གཟབ་ནན་མ་རེད་ཟེར།
སྟག་འབུམ་ཐར་གྱིས་ནན་གྱིས་བསྟན་དོན། ས་གནས་དང་འབྲེལ་ཡོད་སྡེ་ཁག་སོ་སོས་ནུས་ཡོད་བྱེད་ཐབས་སྤྱོད་པ་དང་། བྱ་བའི་འགན་ཁུར་དང་དོགས་ཟོན་གྱི་བྱེད་ཐབས་དངོས་འབེབས་བྱས་ནས། ཕྱོགས་ཡོངས་ནས་མྱུར་དུ་ཐག་གཅོད་པའི་ནུས་བ་ཇེ་མཐོར་བཏང་ནས། ཚད་ངེས་ཅན་ཞིག་ནས་མེ་སྐྱོན་གྱི་གྱོང་གུད་ཇེ་ཉུང་ཏུ་གཏོང་དགོས་པ་དང་། སྟོབས་ཤུགས་ཡོད་དགུས་ནགས་ཚལ་དང་རྩྭ་སའི་མེ་འགོག་བྱ་བ་བཟང་བོར་བསྒྲུབ་དགོས་ཟེར།
ལོ་ཙཱ་བ། བདེ་སྐྱིད་འཚོ། |
